Cando recibirei o título?

Escrito por Administrator

• Unha vez rematada a fase teórico-práctica, desde a escola emitiremos un certificado de aptitude.

• Unha vez rematada a fase práctica e presentada a memoria de prácticas, a escola tramitará perante a Dirección Xeral de Xuventude a emisión do título correspondente. Vén tardando un mes, a contar desde o momento en que a memoria estea corrixida pola escola e as actas asinadas pola directora. Habitualmente facemos unha reunión de claustro mensual. En caso de necesidade,desde a escola podemosfacer un certificado conforme que estás a espera de recibir o título oficial.
  

Cantas horas dura o curso?

Escrito por Administrator

O curso consta dun total de 350 horas, que se separan en dous bloques:

• 1º bloque: 200 horas teórico-prácticas, que se desenvolven nos locais da escola. Tamén se aproveita as insfraestructuras do noso contorno: parques, sendeiros... Normalmente, un fin de semana imos a un albergue.

• 2º bloque: 150 horas de prácticas en actividades de tempo libre, a desenvolver antes de que pasen dous anos desde a finalización da fase teórico-práctica.

Cantas horas se poden faltar?

Escrito por Administrator

Na lexislación actual figura un máximo do 20% de faltas admisíbeis, sempre convenientemente xustificadas. No caso de que estas horas supoñan un bloque temático completo ou gran parte do mesmo, poderase solicitar ao alumno a súa recuperación mediante a realización dalgún traballo adicional, co fin de garantir que a súa formación non conteña ningunha eiva.

Ten en conta que a maior parte da avaliación do curso realízase de xeito continuo. 

Canto custa o curso?

Escrito por Administrator

Depende da convocatoria na que o queiras facer. Mellor consulta o apartado onde aparece información polo miúdo de cada curso. Xeralmente faise desconto facendo a matrícula antes de determinado prazo. Tamén dependerá de se pagas todo por adiantado ou se pagas a matrícula en varios prazos.

Algúns dos cursos, se están organizados por algunha entidade que nos contrata a nós para a súa realización, poden ter a matrícula subvencionada. 

Normalmente, para os nosos cursos contamos cunha bolsa de contratación. Deste xeito, unha vez rematada a fase teórico-práctica podes recibir ofertas para pequenos traballos, recuperando rapidamente a matrícula do curso.

Como podo inscribirme?

Escrito por Administrator
Enviando o formulario de inscrición cuberto e asinado, fotocopia do DNI e fotocopia de título de ensino secundario (ou superior). Pode ser enviado por correo, fax ou entregado persoalmente na sé da escola. Non precisamos de copia do pagamento da matrícula pois xa o consultamos por Internet. Si que é importante que á hora de realizar o ingreso na conta bancaria, te asegures de que poñan o teu nome.

Como saber se quedan prazas libres?

Escrito por Administrator
Se non se indica na da na web, seguro que aínda queda algunha praza. No caso de que avisemos na convocatoria do curso de que a matrícula está completa, recomendámoste que fagas igual a túa reserva. No caso de que alguén non confirme a súa praza ou a anule avisaríamoste de inmediato.

Como se avalía o curso?

Escrito por Administrator

Na fase teórico-practica: cada docente conta cunha ficha individual de cada alumno, cunha fotografía. Esta é unha das ferramentas para conseguir unha boa avaliación continua, xa que nesa ficha o docente examina varios aspectos da actitude e da capacidade do alumno.

Ademais, durante cada módulo desenvolveranse varias tarefas individuais e en grupo que forman parte da avaliación. Algunhas destas tarefas será preciso completalas ao través da nosa plataforma de formación "en liña".

Na fase práctica: o titor de prácticas debera realizar un informe (nós contamos co noso propio modelo) onde avalíe o traballo realizado polo alumno. Ao rematar, este será declarado "apto" ou "non apto" polo titor. No primeiro dos casos, faltará a corrección da memoria de prácticas por parte da escola.

Como se desenvolven as prácticas?

Escrito por Administrator

Tal e como se indique na lexislación vixente: "Realizaranse unha vez rematada a fase teórico-práctica. Constará dun mínimo de 14 días de actividade intensiva, a realizar en campamentos, colonias, albergues, campos de traballo e outros, en bloques non inferiores a 3 días, ou de 150 horas de actividade periódica nunha entidade ou asociación que traballe no eido da educación no tempo libre."

Na práctica, pode ser que xa teñas contacto con algún entidade para a realización das prácticas; revisaremos que o proxecto que queiras desenolver é válido. Podes querer facelas directamente nun campamento de verán. Por último, desde a E. T. L. Animacción ofertaremos prazas para as prácticas en distintas temáticas e horarios. Nos últimos anos, conseguimos que os alumnos que superan a fase práctica en decembro rematen a parte práctica antes do verán, polo que xa poden empezar a traballar durante o mesmo como monitores.

No caso de realizar as prácticas pola túa conta é imprescindíbel que contactes antes connosco, para verificar que o proxecto que vaias desenvolver sexa válido.

É obrigatoria a asistencia ás clases?

Escrito por Administrator
Si, xa que unha parte importante da avaliación é continua, realizada polos docentes de cada bloque de actividades. Pódense faltar un número determinado de horas.

Este curso, é oficial?

Escrito por Administrator

Os cursos de Monitor/a de Actividades de Tempo Libre e Director/a de Actividades de Tempo Libre, toda vez que a Escola de Tempo Libre Animacción está recoñecida oficialmente pola "Dirección Xeral de Xuventude" da Xunta de Galicia (DOG: nº 186 de 25 de setembro de 2001), é un título oficial conforme á lexislación vixente en materia de xuventude. A súa validez a efectos de oposicións, concursos de méritos... será a que se determine nas respectivas convocatorias.

Ao ser unha competencia autonómica, para poder exercer esta profesión noutra comunidade autónoma terás que validalo seguindo o procedemento que corresponda. 

Hai límite de prazas?

Escrito por Administrator

Si. A lexislación vixente marca un máximo de 25 participantes por curso. O límite inferior, tanto por razones metolóxicas como de rendabilidade situámolo entre 15-20 participantes, dependendo de cada convocatoria. No caso de realización do curso para un concello, asociación ou entidade que queira formar un grupo concreto de profesionais, pódese realizar para un grupo máis pequeno de participantes.

Pódese repetir o curso en caso de suspendelo?

Escrito por Administrator

Si, claro. Dependendo de cal das dúas fases suspenderas a solución será diferente:

• No caso de suspender a fase teórico-práctica, habería que matricularse de novo nesta escola de tempo libre ou noutra.

• No caso da fase práctica, haberá que realizar un novo proxecto e executalo, dentro do prazo establecido de dous anos desde a finalización da fase teórico-práctica.

Podo facer á vez o curso de Monitor de Actividades de Tempo Libre e o curso de Directores?

Escrito por Administrator

Non, non se poden facer á vez. A razón a tes na consulta seguinte.

 

Podo suspender o curso?

Escrito por Administrator

Si, claro, como calquera outro curso que se realiza. As causas polas que se pode suspender o curso son as seguintes:

• Faltas de asistencia de maior número de horas do límite estabelecido, na fase teórico-práctica.

• Avaliación negativa por parte dos docentes, en bloques temáticos que sumen máis do 10 % das horas totais da fase teórico-práctica. Nalgún caso poderase artellarse algún xeito de recuperación.
  

• Unha mala realización da fase de prácticas, ben a xuízo do titor da escola ou do responsábel da entidade receptora.

Que requisitos hai para facer o curso de Monitores?

Escrito por Administrator
Ter 18 anos cumpridos no momento de empezar o curso, posuír como mínimo o título da E.S.O. ou equivalente.

Se deixo o curso unha vez empezado, devólvenseme as cotas pagadas?

Escrito por Administrator

Non. Unha vez empezado o curso e confirmada a asistencia non haberá lugar á devolución de cotas de inscrición, independentemente do número de cotas abonadas ou do número de horas asistidas. Hai que ter en conta que o curso se desenvolve unha vez se matriculan un mínimo de persoas. Ademais, seguro que algún interesado ficou fóra do curso por estar as súas prazas cubertas.

Teño que pagar a matrícula completa ao reservar o curso?

Escrito por Administrator
Non. En xeral, haberá que pagar por adiantado unha reserva do curso á hora de apuntarse (devolveríase no caso de que non se celebrase o curso por non cubrirse o mínimo de prazas). O resto da matrícula pagarase antes de que empece o curso (consulta os prazos da convocatoria) ou poderá fraccionarse en varios pagamentos. As condicións concretas figuran na información de cada curso. Algunhas convocatorias teñen un desconto por pagamento por adiantado.

Unha vez feito o curso de monitores, cando facer o de Director de Actividades de Tempo Libre?

Escrito por Administrator

Un monitor que queira facer o curso de Director/a de Actividades de Tempo Libre deberá acreditar unha experiencia de traballo como monitor no campo da educación/animación no tempo libre de, polo menos, 250 horas ou como integrante do equipo de animación en colonias ou campamentos por un total de 30 días, despois da obtención do título de monitor.

Non existe ningún criterio que esixa dous anos de antigüidade, como pensa algunha xente, froito da lexislación anterior.