Unha aposta pola tradición oral. Sesión de contos clásicos para público infantil.

A bruxiña sen vasoira é unha personaxe que percorre distintas culturas. A bruxiña vai surcando os ceos na súa vasoira cando irrompe subitamente no espazo no que se atopan o grupo de cativos/as.

Aclara para sorpresa de nen@s e adult@s que ía visitar á súa amiga Aurora, meiga que está a traballar na elaboración artesanal dun artiluxio de gran precisión para facilitar a existencia aos/ás cativ@s.

A bruxiña tratará de pór a funcionar novamente a súa vasoira grazas á ilusión e aos sorrisos das persoas asistentes. Contos de onte e hoxe, onde nen@s e maiores colaboran nas historias con improvisadas e ricas aportacións. Autores como os Irmáns Grimm, Perrault, Andersen... e tamén contos populares galegos e de creación propia sairán da maleta desta viaxeira incansable que é a nosa pequena meiga. Se os nenos/as gozan das súas historias, a bruxiña poderá proseguir a súa andaina polo mundo adiante.

Este espectáculo é un contedor de historias, de xeito que dúas sesións do mesmo serán sempre diferentes. A cantidade de público asistente non debe ser moi numeroso, pois se perdería o encanto e o ambiente creado ao redor das historias.